Artist y Mis: Carla Hixon

Mae Artist y Mis yn nodwedd lle rydyn ni'n tynnu sylw at waith anhygoel un o'n haelodau.

Artist y Mis am Mai yw Carla Hixon! Darllenwch y nodwedd isod:

Ar hyn o bryd mae gwaith celf Carla Hixon yn cael ei arddangos yn Oswestry Community Action (Y Qube gynt). Mae'r sioe, o'r enw One Gallery 4 Artists, yn rhedeg o 5 Mai i 3 Mehefin.

"Dechreuodd y gwaith yn yr arddangosfa hon gyda Thŵr Eiffel Wrecsam, gan fod ein stiwdio yn edrych dros ffrâm pen hen bwll glo Bersham. Ychwanegais y defaid i ddod ag elfen chwareus i'r darn. Ehangodd y syniad hwn i daith lle mae'r defaid yn cychwyn ar antur ddychmygus o amgylch Cymru, gyda thirnodau enwog o bob cwr o'r byd fel y brif ysbrydoliaeth.

Bydd fy ngweithiau newydd yn adlewyrchu fy nghysylltiad â'r Iseldiroedd, lle daeth fy rhoddwr trawsblaniad mêr esgyrn. Yn ogystal, byddaf yn ymgorffori dylanwad teulu a ffrindiau yn y paentiadau, gan fod fy mhrofiad gyda chanser wedi cryfhau'r cysylltiadau hyn."

Am Carla Hixon:

Carla Hixon (g.1966)

Mae gweithiau celf Carla yn ymwneud â chariad, bywyd a chwerthin. Maent wedi'u peintio'n bennaf ag olewau a ffyn olew, gan greu impasto trwchus. Mae gan Carla stiwdio wedi'i lleoli mewn hen swyddfa cloddio glo ger Wrecsam, Gogledd Cymru.

"Fel plentyn â cholled clyw, treuliais lawer o fy amser yn peintio ac yn darlunio. Fel oedolyn, roeddwn wedi colli 95% o fy nghlyw, felly cymerais brentisiaeth fel peintiwr ac addurnwr ac arbenigo mewn effeithiau peintio arbennig. Parheais i beintio olew gyda'r nos ac ar benwythnosau. Dros 20 mlynedd yn ôl, symudais gyda fy ngŵr a'm mab i Ogledd Cymru, Gogledd Swydd Amwythig bryd hynny. Sefydlais fusnes fel adferwr Cerameg gyda chymorth fy ngŵr. Cefais fewnblaniad cochlear hefyd i geisio helpu gyda chlyw, ond dim ond mewn un glust y mae hyn, felly rwy'n hollol fyddar yn y glust arall. Ar ôl 15 mlynedd lwyddiannus mewn busnes, esi'n sâl yn sydyn a darganfod bod gen i ganser y gwaed.

Dywedwyd wrthyf fod gen i 6 mis i fyw heb drawsblaniad mêr esgyrn. Ar ôl 6 mis, dywedon nhw wrthyf eu bod nhw wedi dod o hyd i ferch yn yr Iseldiroedd oedd yn addas i mi. Achubodd hyn fy mywyd, ond treuliais tua 6 mis yn yr ysbyty gyda chymhlethdodau. Ac ar ôl gadael yr ysbyty, cefais fy ngadael ag anableddau hirdymor. Dyma pryd y dechreuais dynnu lluniau eto ac edrych ar lyfrau celf, gan fod y rhan fwyaf o fy amser wedi'i dreulio ar fy mhen fy hun.

Pan ddes i allan o'r ysbyty o'r diwedd, gwnes i fy ngwthio fy hun i beintio'r rhan fwyaf o ddyddiau i ganolbwyntio fy meddwl a dyfnhau fy niddordeb mewn gwahanol arddulliau. Ers hynny, rydw i wedi arddangos a gwerthu gwaith yng Ngogledd Cymru a Swydd Amwythig, gan gynnwys yn arddangosfa agored Tŷ Pawb yn Wrecsam ac arddangosfa agored Gogledd Cymru yn yr Wyddgrug. Mae gen i arddangosfa gyda thri artist arall yn The Qube yng Nghroesoswallt, yn rhedeg o'r 5ed o Fai i'r 3ydd o Fehefin.

Rydw i wedi dechrau cyfres newydd o luniau, gyda chysylltiad â'r Iseldiroedd a fy nheulu, a fydd yn barod tua mis Medi.

Mae Carla yn aelod o Gelfyddydau Anabledd Cymru ac astudiodd Gelfyddyd Gain ym Mhrifysgol Wrecsam.

Lleoliad arddangosfa:

Oswald Road, Croesoswallt, Swydd Amwythig, SY11 1RB, tel 01691 656882.